مقابلة عمل فاشلة؟ دي كانت البداية
أنا مؤمن إن النجاح مش لحظة بتعيشها، لكنه رحلة مليانة محاولات وتجارب. من أهم التجارب اللي بتمر بيها في حياتك المهنية هي مقابلة عمل رايحها.
ممكن تدخل المقابلة متحمس ومجهز، وتخرج منها مرفوض… بس ده مش معناه إنك فاشل، بالعكس، ممكن يكون ده أفضل درس تتعلمه في الوقت المناسب.
في التدوينة دي، هاحكيلكم عن ٥ مقابلات عمل فشلت فيها، واتعلمت من كل واحدة فيهم حاجة مختلفة، فرقت معايا جدًا في شغلي وطريقة تفكيري.
١. مقابلة عمل جماعية في الكول سنتر – الحماس الزايد بيضر
أول مقابلة عمل دخلتها بعد التخرج كانت في شركة كول سنتر. دخلت مع ٧ متقدمين في مقابلة جماعية. كنت متحمس وبدأت أجاوب بسرعة على كل الأسئلة حتى قبل ما غيري يتكلم. حسّيت إني مميز، لكن المفاجأة إني اترفضت.
اللي اتعلمته من مقابلة العمل دي:
- المقابلة الجماعية بتقيس شخصيتك مش بس معلوماتك.
- لازم تدي مساحة لغيرك يتكلم، وتكون منصت كويس.
- الحماس الزايد من غير توازن ممكن يظهر على إنه غرور.
٢. مقابلة عمل في جريدة – مش كل حاجة اسمها منتج!
قدمت على وظيفة مدير سوشيال ميديا في مؤسسة صحفية، وكنت فاكر إن خبرتي كافية. لكني دخلت المقابلة من غير ما أعرف طبيعة الجريدة كويس، وفضلت أتكلم عن “المنتج” وهم جريدة! المسؤولة عن التوظيف قالتلي: “إحنا مش شركة منتجات.”
اللي اتعلمته:
- لازم قبل أي مقابلة عمل تقرأ عن الشركة كويس.
- افهم الصناعة اللي داخل عليها، واظهر احترامك ليها.
- المصطلحات المناسبة بتفرق جدًا في الانطباع.
٣. مقابلة عمل في مستشفى – اللبس مش مجرد تفصيلة
جالي اتصال من مستشفى معروف لمقابلة في قسم التسويق. لبست كاجوال عادي، ودخلت لقيت كل المتقدمين لابسين رسمي. أول سؤال جالي كان: “إنت لابس كاجوال ليه؟” وحسّيت وقتها بالحرج الشديد.
اللي اتعلمته:
- اللبس جزء أساسي من الانطباع الأول في المقابلة .
- اسأل قبل المقابلة عن طبيعة اللبس المطلوب.
- لما تكون مش متأكد، اختار لبس شبه رسمي كخيار آمن.
٤. مقابلة عمل في HR – حافظ مش فاهم
بعد ما خلصت دبلومة موارد بشرية، قدمت على وظيفة أخصائي HR. في مقابلة العمل كنت بقول الإجابات كأني حافظ كتاب، من غير أمثلة أو فهم حقيقي. النتيجة؟ ما اتقبلتش.
اللي اتعلمته:
- مش معنى إنك درست حاجة إنك مؤهل تشتغل بيها فورًا.
- الأفضل تعرض تبدأ تدريب أو فترة تجريبية لو لسه خبرتك ضعيفة.
- حاول دايمًا تربط بين اللي درسته وبين التطبيق العملي.
٥. مقابلة عمل… بس من غير تفاعل!
في واحدة من مقابلات العمل اللي حضرتها، فضلت قاعد متخشب، إيديا متشابكة، مفيش أي حركة أو تعبيرات. جاوبت على الأسئلة، لكن شكلي كان بيدي إحساس إني مش مهتم أو متوتر.
اللي اتعلمته:
- لغة الجسد بتتكلم عنك قبل ما تنطق.
- حركة بسيطة، تعبير وش، أو تواصل بصري بيعمل فرق كبير.
- خلي شكلك يوصل رسالة ثقة وراحة.
أهم النصائح لأي مقابلة عمل
بعد التجارب دي، بدأت أجهز نفسي بشكل مختلف لأي مقابلة. ودي أهم الحاجات اللي بعملها وبتساعدني:
✅ حضّر نفسك كويس
- اقرأ عن الشركة، منتجاتها أو خدماتها، والمنافسين.
- راجع وصف الوظيفة كويس، وخد بالك من كل تفصيلة.
✅ تمرّن على الأسئلة المتكررة
- زي: “احكي عن نفسك”، “إيه نقاط ضعفك؟”، “ليه عايز تشتغل معانا؟”
- حضّر إجابات مختصرة وصادقة، وجرّبها مع صديق أو قدام المراية.
✅ اللبس بيفرق
- اللبس مش رفاهية، ده عنصر مهم في المقابلة.
- لو مش متأكد، اسأل أو اختار زي شبه رسمي.
✅ اسأل أسئلة
- لما يسألك: “عندك أي سؤال؟” ما تقولش لأ!
- اسأل عن طبيعة الفريق، طرق التقييم، أو فرص التطور.
✅ راقب لغة جسدك
- تواصل بصري، تعبيرات وجه، حركة إيد بسيطة… كلها حاجات بتقول إنك واثق ومهتم.
الخلاصة: كل مقابلة عمل فاشلة هي خطوة لقدام
مش لازم كل مقابلة عمل تنتهي بقبول. بالعكس، الرفض أوقات بيكون أكبر دافع للتعلم والتطور.
كل مقابلة فشلت فيها، خلتني أقوى، أهدى، وأكتر وعي بنفسي.
خد كل تجربة كأنها تدريب، وكل مقابلة كأنها بروفا لوظيفة أحلامك.
لو دخلت مقابلة وما حصلش نصيب، اسأل نفسك:
“اتعلمت إيه؟”
لأن ده اللي هيفرق معاك في المقابلة اللي بعدها.
- أهم شهادات Google Digital Garage: الفوائد وفرص العمل بعد الحصول عليها
- ازدهار التسويق العقاري: كيف أصبحت شركات العقارات أكبر جهة توظيف للمسوقين في مصر؟
- كيف يساعدك التفكير التصميمي والتسويق في البحث عن وظيفة بذكاء أكبر
- أفضل أقسام كلية التجارة لو ناوي تشتغل في التسويق بعد التخرج
- تنسيق كلية الآداب 2025: مستقبلها وفرص العمل في التسويق